نئی دہلی،15/اگست (ایس او نیوز/ایجنسی)  اڈانی-ہنڈن برگ گھوٹالے کی تحقیقات کر رہے سیکورٹیز اینڈ ایکسچینج بورڈ آف انڈیا (سیبی) نے پیر کو سپریم کورٹ سے اپنی تحقیقاتی رپورٹ داخل کرنے کے لیے مزید 15 دن کی مہلت مانگی ہے۔

عدالت عظمیٰ نے قبل ازیں سیبی کو ہدایت دی تھی کہ وہ 14 اگست تک اپنی جانچ رپورٹ (اڈانی-ہنڈن برگ کیس میں) داخل کرے۔

سیبی نے سپریم کورٹ کے سامنے ایک درخواست دائر کی جس میں ٹیکس کی تحقیقات کی اسٹیٹس رپورٹ جمع کرانے کے لیے 2 مارچ اور 17 مئی 2023 کو جاری کردہ احکامات کے سلسلہ میں اسے دی گئی 14 اگست کی آخری تاریخ میں 15 دن کی توسیع کرنے کا حکم منظور کرنے کی درخواست کی ہے۔

سیبی نے کہا کہ عدالت کے حکم کی تعمیل کرتے ہوئے 24 میں سے 17 کی جانچ مکمل ہو چکی ہے۔ اس نے یہ بھی کہا ہے کہ سیبی کے موجودہ عمل اور طریقہ کار کے مطابق ایک عبوری رپورٹ تیار کی گئی ہے اور مجاز اتھارٹی کے ذریعہ منظور کی گئی ہے۔

سپریم کورٹ میں سیبی کی درخواست میں یہ بھی کہا گیا ہے کہ اس معاملے میں سیبی نے اب تک جمع کیے گئے مواد کی بنیاد پر اپنی جانچ مکمل کر لی ہے۔

سیبی نے یہ بھی کہا ہے کہ اس نے ایجنسیوں، غیر ملکی دائرہ اختیار کے ریگولیٹرز وغیرہ سے معلومات طلب کی ہیں اور ایسی معلومات ملنے پر مذکورہ معاملے میں مزید کارروائی (اگر کوئی ہے) کا تعین کرنے کے لیے اس کا جائزہ لے گی۔

سیبی نے کہا ہے کہ وہ توقع کرتا ہے کہ چار معاملات کے سلسلے میں منظوری کا عمل کسی بھی صورت میں سماعت کی اگلی تاریخ یعنی 29 اگست 2023 سے پہلے مکمل ہو جائے گا۔

سیبی نے اپنی ابتدائی عرضی میں امریکی شارٹ سیلر فرم ہنڈنبرگ کی 25 جنوری 2023 کی رپورٹ کے مطابق”اکاؤنٹنگ فراڈ“اور”غیر اخلاقی اسٹاک ہیرا پھیری“کے الزام میں اڈانی گروپ کی کمپنیوں کی تحقیقات مکمل کرنے کے لیے چھ ماہ کی توسیع کا مطالبہ کیا تھا۔

سیبی کی عرضی کو مسترد کرتے ہوئے عدالت عظمیٰ نے 14 اگست کی تاریخ مقرر کی تھی اور کہا تھا کہ وہ غیر معینہ مدت کے لیے وقت نہیں بڑھا سکتی۔